昨日開幕嘅「香港家居博覽2017」除咗有家居用品睇，原來入面仲有個畫家藝廊，主要係賣內地文革海報同北韓手繪海報，參展商黃禮智話，今次展出北韓手繪海報，佢特登揀咗同最近熱門嘅導彈問題有關嘅作品，全部都係第一次展出，「你見到啲畫都紅彤彤，比較吸引」。佢話紅色係代表共產黨喎。
至於文革海報，黃話呢啲作品都好有趣，一套套嗰啲多數都係教人做嘢嘅宣傳海報，好似教人點樣做民兵，其中一幅仲教人點樣打坦克。佢話坦克都有好多弱點㗎，不過佢怕未打爆部坦克，個人恐怕畀坦克壓扁咗。
至於另一幅畫咗阿童木同內地小朋友鬥飛嘅畫，黃禮智話幅畫應該喺中日關係幾好嗰時畫嘅，所以見到阿童木同小朋友都好開心，而幅海報名叫做《飛過阿童木》。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk