民建聯立法會議員、「元秋」蔣麗芸（圖）早排提過喺地區搵流浪貓組滅鼠隊，結果唔係俾人笑就係俾愛護動物人士鬧，但元秋似乎真係好想搶同區立會議員梁美芬「鼠王」個朵。噚日佢就上電台大談佢深入研究老鼠嘅心得，但同場嘅毛孟靜就大潑冷水，話元秋所謂「研究心得」，根本係人都知，使乜深入研究！
「貓見到人類睇唔到嘅嘢」
元秋話經佢深入研究之後，聲稱原來除咗港人越嚟越長命，連港鼠都越嚟越長命，而且食環署自2006年起禁止街市商戶養貓，令每年人道毀滅嘅貓有逾千隻，結果政府唔畀養貓，就變成養老鼠囉！元秋又認真話，經佢研究點解老鼠怕貓，原來係貓身上有特別氣味令老鼠厭惡，仲話貓嘅視力夜晚特別勁，見到人類睇唔到嘅嘢㖭。
咁元秋想點搞流浪貓滅鼠隊？元秋建議先搵2、3條後巷作試點，又形容自己嘅建議係冇辦法當中嘅辦法。但毛孟靜即場大潑佢冷水，話老鼠繁殖力驚人、老鼠怕貓，根本係人都知，使乜深入研究！
Miss Mo仲話現時多區都有鼠患，有人話係因港鐵沙中綫工程導致，仲話現時鼠患問題已牽涉其他問題，好似如果係鼠患嚴重地方，放置太多老鼠藥，會引起養狗人士擔心，怕狗仔會誤食老鼠藥。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk