曼聯中場保羅普巴去季挾一億歐元轉會費由祖雲達斯加盟，表現雖然難以稱得上同身價成正比，但球季中後段逐漸上力並展現助攻功架，總算協助球隊贏得歐霸盃，來季有得踢歐聯。不過，普巴想放暑假仲要等等，因為佢要代表法國出戰國際賽，包括今晚作客瑞典嘅世盃外，以及下周二對英格蘭嘅友賽。
既然未有得盡情玩，普巴一於將無窮精力發洩喺操練度。法國國家隊周四喺社交網站上載短片，見佢連續接應4球傳中波，頭頂腳踢瓣瓣掂全部入晒，包括兩腳食到應一應嘅「窩利」，連最後一球「撻Q」都收死波爾多門將哥斯迪！唔知曼聯球迷會唔會心諗，如果你下季歸隊都係咁腳腳七注就好囉……