早排因為全城熱議嘅旺角食飯「AA制」事件中，示範咩叫靚抽而人氣急升嘅牛角老闆黃傑龍（Simon），上月喺房協宣佈研究喺兩幅郊野公園地建屋後，離奇遭網民傳短訊狂鬧佢破壞郊野公園，所為何事？原來因為佢同公佈上述計劃嘅房協行政總裁黃傑龍同名同姓，連英文譯名串法都一模一樣，結果誤中副車。遭網民鬧爆嘅Simon話，當日被鬧時都覺得好出奇，經佢解釋後，對方初時未有道歉，只係話：「邊個叫你同佢同名同姓？」Simon真係「躺着也中槍」。但有網民知道點錯相後都同佢say sorry。
3年前與對方「相認」
Simon透露，今次已非首次俾人認錯，過去試過有傳媒來電問佢老人政策問題，令做開飲食嘅佢莫名其妙，最後佢強調「我係餐飲黃傑龍喎」，對方先知道搵錯人。
而佢過去任職路政署時，已知房協有位同名黃傑龍，仲覺得自己把聲同個樣，都同對方有啲似，佢話同對方唔係好熟，但都係公開場合見過面。3年前佢出席資歷架構督導委員會活動，終於同呢位黃傑龍「相認」，雙方交換卡片時都笑咗，連主持活動嘅教育局局長吳克儉亦不忘食花生，主動要求同兩位黃傑龍合照喎。
由於Simon公職多，佢都怕會違反政府嘅「六六原則」公職指引，所以政府委任佢時，佢都反叫政府幫佢check一check穩陣啲。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk