一帶一路開始有眉目，仲有阿爺條大水喉射住，係人都想搭順風車，分一杯羹。董事學會今年度嘅「傑出董事獎」，亦係用「一帶一路」做主題，但講到明公司、董事會並唔一定需要提交與一帶一路相關嘅往績或者商業計劃喎，吓，咁都得？
聯交所上市主管戴林瀚（David Graham）話，明白一帶一路好多未知數，夠晒刺激，但要留意喺沿線國家做生意，往往有意料之外嘅風險，董事責無旁貸。
董事學會卸任主席黃天祐都話，留意到有啲公司較為進取，不惜借錢投資落一帶一路，諗住符合國策就一定有商機，但冇仔細考慮公司承受風險嘅能力。萬一有乜三長兩短，對小股東非常不利。所以今年獎項特登用「一帶一路」為主題，就係想提高大家對一帶一路呢類未知風險嘅意識，想參加試身手嘅公司、董事，並不需要有一帶一路相關經驗。
咁點樣先有機會突圍而出呢？董事學會副主席梁廣灝就教路，唔好以為猛講公司賺幾多錢、隱惡揚善就Sure win，班評判根本對業績冇乜興趣，反而若能夠藉住曾出現嘅危機，解釋到點樣解圍嘅話，就可以加分嘞。
「傑出董事獎」今年係第17屆舉辦，恒指成份股、非恒指成份股、私人公司、法定組織或非分配利潤組織（例如NGO）四大類公司，都可以提名執董、非執董（個人獎），同埋董事會（集體獎）參加，即日起至7月底報名，11月底公佈結果。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk