利物浦日前想爭簽修咸頓中堅華基爾雲迪積克一事，隨住周三發表聲明，為自己私底下非法接觸呢位荷蘭國腳向「聖人」道歉後，正式埋單，如果睇番成單嘢，紅軍領隊高路普今次真係瘀到爆。
高路普傳親自遊說
紅軍今季英超雖然重返前四，重奪歐聯參賽資格，但高路普一向唔係好滿意條防線經常有漏洞，尤其中堅更加係死穴，無論洛夫雲、祖爾麥迪比同卡拉雲，都未如想像中穩陣，所以今夏一定針對呢個位置買人，睇中修咸頓嘅荷蘭中堅華基爾雲迪積克。眾所周知，紅軍過往幾個轉會窗都好興去修咸頓掃貨，買入嘅拉爾拉拿、洛夫雲、尼達利基尼同今季一加盟就當選咗紅軍年度最佳球員嘅沙迪奧文尼，全部已係球隊骨幹成員，於是以為同修咸頓關係唔錯，今次斟雲迪積克亦唔會甩拖，點知對方為阻紅軍挖角，將原本已標價6,000萬鎊嘅雲迪積克，再加價至7,500萬鎊（約7.6億港元），而且為達到目的，高路普仲被傳親自走去黑池，秘密會見放緊假嘅雲迪積克，想游說佢加盟，結果激嬲修頓，向英超賽會投訴。
最終，利記周三就發聲明就今次嘅行為道歉：「對於近日傳媒就有關兩間球會之間嘅球員轉會事宜炒作，我哋向修咸頓表示遺憾，有關以上一切誤解，我哋亦要向修頓班主、董事局同球迷致歉。我哋尊重修咸頓，亦會由呢刻開始，終止對該球員（雲迪積克）嘅興趣。」
《獨立報》就話高路普今次好明顯睇錯個局勢，雖然本身繞道私下接觸雲迪積克，教唆對方逼宮，向球會提出轉會申請甚至罷踢等等，從而喺轉會價錢上可能有斟酌餘地，亦並無不妥，但就衰在成單嘢太高調，同埋去年11月聘請嘅體育總監米高艾華士，公關手腕唔掂，促成今次買人失敗。
轉斟拉素中堅迪維積
不過調番轉頭諗，紅軍買唔到雲迪積克亦唔係咩壞事，7,500萬鎊買個中堅返嚟，對方又唔係好似邦路斯或者華拉尼踢過大會，今次隨時因禍得福唔使做水魚。據《每日鏡報》話，紅軍已經瞄準另一位荷蘭中堅、拉素嘅迪維積，隨時買得仲平啲；講真，成個夏天流流長，睇定啲再出手都未遲。