添好運繼殺入美國紐約開舖後，再進軍法國波爾多？仲同國福樓拍住上？其實，兩間食肆係獲旅發局邀請一齊去波爾多，參加6月18至21日當地國際知名嘅酒展Vinexpo，而且當局會喺展覽特別開設一間香港餐廳，由添好運嘅麥桂培及梁輝強、國福樓嘅葉卡安師傅齊齊炮製美食。而呢兩間香港米芝蓮一星食肆，仲會crossover波爾多米芝蓮推介餐廳「燈」嘅法國大廚Jérome Billot 。
添好運除咗會炮製撚手嘅燒賣王、酥皮焗叉燒包等，仲為活動新創沙律魚米多士；國福樓就會有花雕蛋白蒸龍蝦球、砵酒炆牛尾牛脷。至於Jérome Billot嘅法國大餐當然多嚿魚啦，所以有梅子醬三文魚生沙律等。其實佢曾經喺香港工作7年，之後同香港太太返波爾多開餐廳。
波爾多國際葡萄酒及烈酒展覽會，兩年搞一次，全球酒業界人士都會去，而香港餐廳係場內9家餐廳唯一一間亞洲菜，設喺波爾多湖畔，畀各國旅客業界一嚐香港美食。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk