景福（280）早前宣佈大股東楊氏家族第三代楊嘉成，回歸公司擔任執行董事，公司噚日再宣佈，委任沈美蓮做行政總裁（CEO），即日生效。
本來，上市公司委任CEO閒過立秋，但景福呢份通告真係好有趣，佢介紹沈小姐，只得一句，就係「五十三歲，具超過二十八年零售業務管理經驗」，需知道「零售業務管理」好廣泛喎，一個人開魚蛋檔（同樣包含管理成份），管理超市又得，管理化妝品連鎖店都得，請問沈小姐做過邊瓣呢？寫多幾行介紹都咁難？
沈小姐試用期都有月薪15萬元，過百萬年薪請一個人，是咪應該詳細少少向大眾投資者介紹番呢？
介紹得精簡唔緊要，景福明明話請緊沈小姐，去到通告尾部，變成「劉小姐確認....」忽然變為劉小姐，又請問公司請緊姓沈，定姓劉嘅做CEO呢？幾個鐘之後，景福再出通告澄清，指寫錯，係沈小姐至啱。
齋睇公司通告，景福請呢位CEO似乎好趕囉。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk