人同動物之間嘅感情，有時候真係難以用筆墨嚟形容。而香港馬壇正正有一對老拍檔，彼此之間絕對可稱得上有情有義，講緊嘅就係愛爾蘭籍騎師郭能同埋「將男」。
8歲嘅「將男」一直都係大賽殺手，每次跑大賽永遠都在不被睇好之下，往往郭能就會騎住「將男」成為程咬金，殺各大熱門一個措手不及。
最精彩嗰一場賽事，肯定就係上季遮打盃（一級賽2400米），喺最後直路階段，前列三駒包括「將男」、該場第三熱門「凱旋生輝」同大熱門「明月千里」竟然鬥到你死我活，最後「將男」就憑9.3倍半冷身份，以短馬頭位氣走其餘兩駒。
可惜呢匹鬥心勁強嘅橙衫馬就係剛周二（6日）退役，而身為老友嘅郭能當然就有喺社交網絡平台感謝「將男」帶俾佢好多難忘嘅回憶，而佢亦都再一次希望「將男」退役之後，可以去佢老婆屋企人個牧場安享晚年，仲話萬事俱備，只欠馬主答允嘅東風。
其實「將男」自13/14季尾由郭能接手後，呢匹馬每次奪得大賽都係同「將男」一齊衝過終點，而郭能喺香港拎咗四個一級賽之中，其中三個就係同「將男」共同攻下。
難怪郭能咁唔捨得同呢匹馬分開，繼而想獲得其擁有權。佢哋兩個真係夠晒有情有義，希望最終郭能能夠得償所願。