利物浦好眼光，佢哋今夏簽入嘅英格蘭新星蘇蘭基喺周四世青盃四強梅開二度，幫「幼獅」以3:1反勝意大利U20，史上首次打入世青盃決賽，下周日會同委內瑞拉爭冠。
今夏約滿車仔投紅軍
英格蘭U20喺開波兩分鐘就先失波，被意大利U20嘅奧蘇連尼開紀錄；呢位意軍鋒將今屆腳風好順，已經有五球進賬，排喺射手榜首位。英格蘭喺下半場大反擊，蘇蘭基先喺66分鐘追平，到77分鐘再由盧卡文建功，反超前2:1。88分鐘，蘇蘭基射入今場個人第二個入球，幫英軍鎖定以3:1反勝意大利。蘇蘭基今場入兩球，非常搶鏡，呢次利物浦真係執到寶嘞！19歲嘅蘇蘭基原本係車路士嘅青訓產品，但今夏約滿，決定走去紅軍。
周四另一場四強亦好激，委內瑞拉U20喺補時先扳平烏拉圭U20，最後互射12碼擊敗對手入決賽。迪拉告魯斯喺49分鐘幫烏軍開紀錄，但喺91分鐘，委內瑞拉嘅森美爾蘇沙左腳射出靚罰球，皮球直飛遠柱上角入網。兩隊法定時間賽和1:1，而喺加時，兩隊亦冇入球，比賽進入互射12碼階段。喺頭四輪，兩隊各有一人射失，到第五輪，委內瑞拉的恩高靴里拉射入，但烏拉圭嘅迪拉告魯斯射失。委內瑞拉喺12碼贏4:3晉級決賽。