記者小G係迪士尼癡，由小女孩至到今日為人母，都鍾意去迪士尼玩，結婚之時，擺酒都揀在迪士尼酒店。最近佢同愛兒及家人又到迪士尼玩，回來後話俾左丁山聽：「好彩我個係仔唔係女啫，否則要用多啲錢買衫俾佢，我見到幾乎每一個小女孩，幼稚園年齡嘅，都係穿着Elsa裙，個個要買Elsa產品，細路女入到迪士尼，冇Elsa裙着，會喊㗎！」
將此消息話俾沙田陳太知，佢正計劃帶孫女（其實係應孫女之命）去迪士尼，預備到嗰間最新落成嘅酒店住一晚。聽見呢個消息，話明早有準備，兩個孫女每人都已經有五六條Elsa裙，一啲問題都冇，不過會向孫女講明，入到迪士尼，唔會亂咁買嘢，一定要聽話，否則冇下次。講就係咁嘞，到時陳太啲仔女會唔會向孫女屈服就係另一個問題。
沙田陳太話：「抄陶傑口水尾，美帝主義文化侵略好厲害，不需國民教育，不需聽習主席金句，依家啲細路自自然就迷晒Frozen，戀上Elsa，呢一代十歲以下嘅香港細路女剩係識Elsa與Peppa Pig，邊度識基本法呀！」咦，Peppa Pig好似係英帝國文化侵略噃，真弊，英美帝殖文化聯手為港孩洗腦，下個月上任嘅教育局長楊潤雄有乜辦法對抗，反洗腦，落實張德江委員長嘅學習基本法訓示呢？另一方面，上海迪士尼聽聞大受同胞歡迎，迅速開始賺錢，即係話美帝文化已開始為中國小孩洗腦，2047年嘅中國大陸大學畢業生，會唔會係唐老鴨、米奇老鼠思維？到時香港回歸一國一制都幾自然。
沙田陳太話唔駛為中國同胞擔心，現在要為孫女改變思想先至頭痛。流行卡通灰姑娘Cinderella（仙履奇緣）歷史悠久，陳太讀小學時已經迷上呢套1950年面世嘅卡通，佢嗰一代人個個女孩都恨做Cinderella，穿上玻璃鞋，等待白馬王子。點知佢將呢套卡通片俾兩個孫女睇十幾次之後，兩個孫女話唔羨慕灰姑娘，要做繼母嘅一對Step sisters。未夠三歲，未夠五歲嘅孫女居然識答：「灰姑娘好似係阿時（家中菲傭）咁，成日要洗枱抹地嘅，我地要做Anastasia」，唉吔，陳太為之一驚，開始要諗方法糾正孫女嘅「我唔做僕人」嘅思維。香港有好多好多「菲傭湊大照顧的一代」，染上好逸惡勞、等人服侍我嘅觀念，到十幾歲仲未改變嘅話，他日邊度肯刻苦耐勞捱世界呀？問陳太有乜方法，陳太話：「諗緊，或者要佢地早上自己着鞋着衫返學，唔俾菲傭幫手先。之後要逐步逐步嚟，叫兩孫女做一啲家務。」