盛傳係候任特首林鄭月娥嘅教育局局長首選、香港教育大學校長張仁良無意走入熱廚房，留喺教育界，一樣好巴閉！佢最近獲法國駐港澳總領事栢海川（Eric Berti）頒授棕櫚教育軍官榮譽勳章，表揚佢對高教界嘅貢獻。
呢個勳章早喺1808年由法國國王拿破崙一世設立，係法國最悠久嘅非軍事榮譽勳章。曾經喺法國留學、1985年獲法國巴黎第六大學統計學博士學位嘅張校長，留學期間仲識咗法籍太太，同法國淵源甚深，一直促進港、法嘅文化交流，仲同在港法屬僑民保持緊密聯繫。
授勳儀式前日喺法國領事官邸進行，張太同囝囝及教大校董會主席馬時亨都有出席。張校長話對獲授勳好榮幸，自言30幾年前獲法國政府獎學金旅法留學係佢人生啟蒙期，至今仍深存感恩。罕有登場撐老竇、26歲現於德國iBank做嘢嘅張公子憑住燦爛笑容，全場矚目，但點都唔及張太送上情深一吻咁搶鏡。