快活谷今晚（7日）幾乎俾外籍騎師玩晒，前四場有三場由佢哋勝出，華人騎師僅靠巫顯東第三場贏「瀟洒兄弟」。跑到第五場三班1800米，又見到過江龍贏馬，主角李寶利連續第二次策騎苗禮德馬房「英明神駒」，結果後上爆出35倍冷Win捧走木球會錦標，組合獨贏A3派47.5元。
法國灰色自購馬「英明神駒」係這晚跑到第五場為止，連續第五匹勝出的五歲馬，本身在祖家贏過1800米表列賽馬湛大賽，但來港後初期未適應水土，一直冇表現。今季開始有料到，2月中由法國籍公司騎師巴度爆冷贏三班谷草1800米開齋，這晚由另一歐洲騎師意大利好手李寶利，於同班同程重響勝鼓，兩次都係30幾倍冷馬，此駒可謂天生冷門命。
李寶利自早前外遊曬到黑晒返港後大旺，剛戰一日取4Win後，今晚又贏「英明神駒」。苗禮德剛從澳洲回香港，即刻有頭馬見面，老苗表示「英明神駒」需要快步速幫助，上仗步速不利所以交不出應有水準，他更幽默笑說要向潘頓講聲多謝，因為潘頓騎「文藝學家」扯快步速，令「英明神駒」收漁人之利，而李寶利守住好位跑得十分輕鬆，遂能取勝。
第五場熱門全叮，包括3.3倍大熱門「文藝學家」於中段鞍上人潘頓無故加速擺前帶頭跑，以致直路力弱墮退，完全違反近兩仗全勝的後上跑法，輸8.5馬位跑第9，潘頓騎法令人摸不着頭腦。
今場前四名均屬冷門或大冷門，「英明神駒」爆35倍Win；24倍「精算博奕」力拼做阿二，Ｑ派2,750.5元。36倍「閃電王」及99倍「勇創潮流」順序跑第三及第四名，四重彩派近178萬元。