長實地產（1113）荃灣海之戀1期近沽清，噚日話就話喺尖沙嘴喜來登酒店搞慶功宴，原來係第2期命名儀式。宴會前，播郭富城《對你愛不完》，繼續肉麻，想大家對海之戀嘅愛不要完。
開名前，樓神趙國雄先抽個水:「我哋呢度方便，有西鐵，使乜去到咁遠，又要轉巴士……」集團投資董事郭子威緊接話：「仲要蚊怕水。」趙國雄即刻接番：「隔咗成年，啲蚊大隻咗好多。」二人唱雙簧咁暗寸同期開售新地（016）元朗Park Yoho偏離元朗站又多蚊。
第二期命名「海之戀． 愛炫美Ocean Supreme」，趙生解畫：「Supreme大家知道點解啦？正斗，最正，至高無尚。愛炫美，炫，值得炫耀下嘅!」
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk