數今周球壇大事，必屬本地老牌班霸南華降班，南華唔係成績差被迫降，而係聲稱話要專注搞青訓而去降班，真係香港球壇特有怪現象。如果外國球迷問起，真係唔知點去解釋；或者只可以用四個字概括：「老細足球」。
唔好睇英超咁風光就以為搞足球實有錢賺，不知幾多西甲同意甲中下游球隊財困，搞波等於倒錢落海其實先係普遍現象。
香港足球，入場球迷少，贊助就更加係聊勝於無，至於轉播費就更加唔好提。用小學生都識嘅加減數計一計都知，香港搞波賬面上的確係倒錢落海。當然，香港地唔缺有錢佬，如果倒錢落海可以倒得有頭有面、開開心心，又可以拎到冠軍，實有人去倒。
香港地搞波，相信一季頂多倒一兩千萬港紙，但德國那邊，有個富豪每季倒數以千萬歐元，幫佢愛隊。呢位有錢佬叫古尼（Klaus-Michael Kuhne、圖），外號漢堡船王，係德甲護級鬥士漢堡嘅忠實球迷。漢堡近幾年財政狀況唔好，古尼不斷注資同借錢畀漢堡，由於漢堡還唔到錢，惟有以債轉股，甚至係以半捐半借形式，話漢堡入到歐洲賽先至還。
家陣古尼有17%股權，但德國足球有50+1政策，古尼係冇辦法買起漢堡，畀錢都冇得話事。2015年，佢仲買起漢堡主場冠名權，但唔係改做古尼球場之類，而係將球場回復舊名叫人民公園球場。就算漢堡好似無底深潭，倒極錢都係護級，但古尼話呢個夏天會繼續投資（捐錢）。
香港搞老細足球，至少畀錢就真係有得話事，而古尼呢種唔可以叫老細足球，應該叫善長足球，齋畀錢。唔知有冇南華會唔會好似漢堡咁幸運，突然走個加路連山道船王出嚟幫手呢？
文：咖喱