佳士得倫敦將於6月17至30日舉行「二十世紀藝術周」，27日則會舉辦「印象派及現代藝術」晚間拍賣，會以藝術大師巴布羅．畢加索於1934年嘅油畫《寫信的女人（瑪麗－德雷莎）》為領拍作品，估價達2,500萬至4,000萬英鎊（即2.5億至4億港元），同場仲有印象派大師莫奈嘅《垂柳》，估價1,500萬至2,500萬英鎊（約1.5億至2.5億港元）。公眾今明兩日可到香港佳士得藝廊預約觀賞億元名畫。
而其中《寫信的女人（瑪麗－德雷莎）》首度喺亞洲亮相，作品創於1934年3月26日巴黎布瓦杰魯古堡，畫中嘅女子係畢加索嘅情人瑪麗－德雷莎．華特（1927年邂逅畢加索時只有17歲），佢坐喺窗邊一張華麗嘅啡色皮革椅子上寫信，陽光灑入凸顯出佢輪廓線條。
佳士得印象派及現代藝術部門高級副總裁暨資深總監何杏淇指，畢加索筆下有唔少女性，繪畫瑪麗－德雷莎時係用簡單構圖同弧形線條，以突出其圓臉及性感魅力，並充滿歡欣同幸福嘅氣息。
同系列作品12億成交
呢幅畫作係畢加索好like嘅作品，私下珍藏廿幾年至1960年，其後多次私人收藏轉手。
同系列作品《夢》則喺2013年以1.55億美元（約12億港元）成交。
莫奈嘅《垂柳》就係1918至1919年間嘅作品，有別於其著名《睡蓮》系列，《垂柳》用上厚重油彩表現佢年老無法參軍嘅激昂情緒。此系列只有10幅作品，其中5張已為博物館收藏，所以喺拍賣市場彌足珍貴。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk