講起鄭少偉，你可能仲會諗下到底佢係邊個。但如果個名係「港版亨利」，對本地足球稍為有認識嘅人，應該都會即時諗起呢位踢過唔少本地大球會、最近喺東方龍獅退休嘅香港前鋒。
由元朗嘅街場踢起，俾前香港足球代表招重文發掘之後，輾轉踢咗15年職業足球。除咗得到「港版亨利」嘅外號，近年踢波幾乎冠軍獎盃跟住佢走，銀牌、聯賽、足總盃到省港盃都贏過，可以話係捧盃捧到手軟。
鄭少偉一句總結話係因為自己幸運，但如果只係「好彩」兩個字嘅話，就完全抹殺咗呢位香港土產前鋒咁多年嚟嘅努力。15年職業足球員生涯結束，「港版亨利」算係踢完人生嘅上半場，下半場點樣踢落去，佢仲需要時間去摸索，但係有一樣嘢，鄭少偉心入面已經有一個好肯定嘅答案。
記者：三井
攝影：彭志行