騎練雷神莫雷拉同蔡約翰，剛周日（4日）同於日本以合作「詠彩繽紛」出戰安田紀念賽，雙雙缺席沙田日馬。結果「詠彩繽紛」無功而還，雷神自己則在當日其他場次騎日本馬起孖。
這晚回師跑馬地馬場，雷神、蔡約翰頭三場均冇料到，直至第四場四班一哩攜手出擊，合作勝出落飛馬「精算追擊」，此匹五歲馬季內首度取勝，單Win及組合獨贏A2分別派59.5及20.5元。
雷神跑馬幾時都醒過人，「精算追擊」賽前從未贏過谷草，今場12檔一嘢快速cut入跑主動領放，直路猶有餘勁，成功以1.25馬位之先帶返終點，打破馬兒今季齋缽，雷神自然功不可抹。至於蔡約翰連續第六個賽日贏馬，今季暫有87Win，繼續領先排第二的大摩21場頭馬，穩奪今季冠軍練馬師寶座。
「精算追擊」馬主龐氏家族話事人龐維寧表示，莫雷拉控制步速非常好，發揮出色應記一功，當然蔡約翰悉心訓練，也是贏馬功臣。
如果唔係雷神機警放頭早着先機，走位出神入化，郭能呢場分分鐘贏「得其康」個人中三元，「得其康」末段從後殺上追唔切做阿二，而三、四名順序為「越跑越好」及「全勝姿態」，四重彩派五萬七千幾。
其中霍利時馬房第二至四場「樂家將」、「旅英駿爵」及「得其康」一連三場均屈居亞軍，今晚仲未有頭馬見面。