中華煤氣（003）噚日舉行股東會，同星期一恒基地產（012）股東會一樣，人稱「四叔」嘅主席李兆基只係主持會議，會上冇點答股東提問，會後亦冇見傳媒，但現場見佢精神奕奕，說話時保持一貫狀態。小股東似乎好錫四叔，有人提問前祝佢身體健康，仲有小股東作咗首詩送畀佢㖭喎。
四叔今年89歲，噚日有位88歲嘅長情小股東喺會上送上一首詩畀四叔，詩句是咁的：「煤氣佳訊頻，送股息股增，累積成小康，晚景如彩雲，感謝四叔者，俱是持股人。」佢用毛筆寫好詩句，喺現場朗讀完，四叔「左右手」林高演好識做，即刻叫人收起呢首詩，佢即場再讀一次，以示對呢位老股東嘅尊重，四叔收到亦笑到見牙唔見眼。
「送股息股增」指紅股
詩句入面提到「送股息股增」，應該係指煤氣過去多年，派超過10次紅股，每次都係十送一紅股，股東手上嘅煤氣股票自然有所增加，只要股價維持喺一定水平，股東一般都會歡迎收取紅股嘅。
不過亦有例外，噚日有一名小股東就投訴，收取紅股搞到佢好亂，建議呢10%股息不如直接喺股價度反映，林高演隨即笑住回應，指呢個建議好有創意，不過佢哋要跟番會計師嘅建議去做咁話。
李華華
mailto:[email protected]
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk