法國前鋒基奧特今年一月先同阿仙奴續約到2020年，今季射入16球嘅佢對於喺啱啱嗰季英超只係得11場正選機會、有18場要後備上陣有啲不滿，加上知道領隊雲格喺今夏準備再加強鋒線實力，令佢心灰意冷，仲話唔會接受下季都係咁，暗示有機會走人：「我都好想贏英超冠軍，亦知雲格對我有期望，不過我唔會滿足咁少嘅上陣時間……我諗係時候同身邊人同埋經理人認真考慮之後條路點行。」
除咗基奧特，雲格可能都要諗計點留住另一主力比利連，據英國傳媒透露，西甲勁旅巴塞隆拿計劃以4,500萬鎊（約4.5億港元）轉會費，將呢位西班牙後衞撬走。22歲嘅比利連喺2003至11年曾效力巴塞青年軍，舊年先同阿仙奴續約到2022年，但據知佢啲家人已離開倫敦返番西班牙，佢又話自己同家人關係密切，加上希望出戰歐聯，似乎重返母會機會大增。