經民聯梁美芬向來關心鼠患，但最近出現勁敵，就係同屬九西嘅民建聯蔣麗芸，元秋繼早前要求漁護署訓練流浪貓捉老鼠，噚日再喺立會提質詢，要求食物及衞生局局長高永文考慮用流浪貓組成「社區貓隻滅鼠隊」，再喺老鼠黑點試行，民望高答得好認真，話當局要確保流浪貓合乎衞生、人道標準，而貓隊滅鼠嘅成效仲有待論證，當局要同持份者探討係咪可行。
其後，連新民黨葉劉淑儀都追問民望高，手下到底有冇真正滅鼠專家，「如果冇，可唔可以問吓我哋鼠王芬妹妹，喺廣州帶啲（專家）嚟？」鼠王芬妹妹相當受落仲自嘲：「我自己亦都因為治蟲患有個花名，唔緊要，希望18區都有鼠王，區議員同立法會議員一齊跟進」，繼而批評政府治鼠政策太官僚，搞到區區有鼠患，仲叫食環署積極考慮搵內地專家幫拖。
民望高似乎冇咁好氣，強調食環署嘅防治蟲鼠組有好多專家，會督導前線員工滅鼠。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk