季尾枕住有馬匹成功開齋，今晚（7日）谷草一開場第一場五班1650米，就有葉楚航馬房「君子承諾」由騎師郭能打開勝門，單Win及組合獨贏A2分別派56及16.5元。
五歲新西蘭自購新馬「君子承諾」第二季出道，之前最叻跑第三，跑到今次第12場用番上季初出騎師郭能，本身降班首戰五班賽，結果留前鬥後，負133磅排9檔形勢欠佳下，仍以輕鬆姿態攻下谷草一哩，贏兩個馬位，錄得服役首捷。
與「君子承諾」綵衣接近的「君子精神」養於蘇偉賢馬房，「君子精神」季初贏谷草四班1000米開齋，鞍上人亦是郭能，呢位愛爾蘭好手堪稱「君子」系福將。至於葉楚航方面，佢對上一次勝出谷草已經數到5月3日由巫顯東贏「心中有善」，馬房今季谷草暫得11WIN，佔頭馬總數31場的三分一左右。
葉楚航目前正身處澳洲參與馬匹拍賣會，沒有在港督戰，但他有越洋看賽事直播，為旗下馬打氣。郭能表示「君子承諾」排9檔不好，好彩有快步速幫助，論質素此駒高過一般五班馬，只要保持進度，估計牠仍有頭馬見面。
頭場賽果熱頭冷腳，二、三名分別由31倍「多多囍」及97倍「掌握時機」取得，第四名是次熱「駕悅」，四重彩派11萬幾，夜馬一跑番快活谷即爆鑊甘！