繼續寫惠理（806）賣盤。有基金朋友跟密西比說，與其關心惠理大股東謝清海出售原因，倒不如關心他以往沽貨時機。他說：「謝清海第一次沽惠理，就係惠理上市，嗰陣喺2007年年尾，美股10月創咗新高，但好快喺美國次按危機越爆越勁情況下，2008年爆發咗個股災，更催生橫掃全球嘅金融海嘯。」
第一次沽貨發生世界性股災，第二次沽貨，中國出現「龍級股災」。友人說：「2016年5月尾，謝清海減持9,800萬股惠理，持股跌穿30%大關，之後出嚟解晝，話沽貨並唔係睇淡個市之類嘅官腔解釋，話口未完，A股6月中就開始急跌，並喺7月擴散至全球，全年埋單計，同嗰年高位比較，A股足足跌咗4成。」
減持時間居然可以如此精準？友人笑說：「係呀，之前我見過有人將謝清海形容為香港最識得沽貨嘅男人，某程度上都係啱嘅，次次沽貨都真係靚價，但又咁講，兩次都係沽自己嘢，批貨到底值咩價自己就應該最清楚……所以今次佢有可能沽清離場，大家睇路。」
「遲唔會遲，早唔會早，時間啱啱好。」
密西比
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk