羅馬集團（8072）前晚宣佈，搵來識得「應肚即飛」神功嘅美聯前高層黃錦康加盟，擔任首席策略官，須知道黃師傅近5年相當低調，冇幫人打工，今次可算係出山。問佢有乜大計，佢就話仲度緊，反而好高興咁同大家講，佢近年功力大增，練成一陽指。勁喎！
提起黃錦康，不得不提佢嘅獨門神功應肚即飛，想當年，2012年倫敦奧運期間，佢花500萬推廣自創獨門太極拳奇招，示範一招應肚即飛，當師弟一拳打向黃師傅肚皮，即刻被彈開，呢條片至今仍是財金界熱話。
「手指掂一掂 對方就彈開」
黃師傅好坦白咁講，就係呢條片，令佢過去5年的起心肝，潛心修行，家陣佢嘅功夫已經包含理論基礎，可以同人解釋到，而應肚即飛只係初階，佢仲識得一陽指㖭，「我用隻手指掂一掂人，（對方）就會彈開」。佢話，已經收咗唔少徒弟，不過唔係人人都啱，要講緣份，「有人出100萬，我都唔教」。
講完功夫，講番羅馬集團。羅馬早前被廉署上門拉人，涉事嘅陸紀仁辭去主席同行政總裁職務。黃師傅指，加盟公司都係經朋友介紹，講緣份，佢呢個策略師有何大計呢？佢仲度緊，不過公司快將搬寫字樓，有「新天新地」咁話。羅馬噚日升12%，收報7.6仙。
李華華
mailto:[email protected]
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk