練馬師高伯新(喼神)上月底憑「歡樂一生」贏夠季內第16場頭馬達標上岸後，並沒有留手，剛戰又勝出「幸運大師」，馬房目前正氣勢如虹，而旗下普遍賽駒，操練亦無放緩跡象，仍積極備戰，看來打算在唞暑前盡情數糊。
今朝高伯新又有動靜，他睇完數匹自己的周三(7日)夜賽戰馬踱步後，又與33歲本地騎師黎海榮密斟，商討搏殺大計，非常積極。今期這對騎練合作兩駒「精壯神駿」、「贏科超影」，估計應有作為。
第五場「精壯神駿」上仗由沈集成轉投高伯新初出，跑谷草1000米擺明嫌短，熱身目的已達，今仗角逐三班1800米較合適，排3檔及只負116磅都是優勢，隨時可為高伯新擦靚招牌。
至於第六場三班1200米之「贏科超影」，此駒上仗初配黎海榮跑同程，158倍大冷跑第三，3歲馬既有潛質，走勢亦大有進步，今次原庄人馬再來，黎海榮為保帥印自然砌得就砌，不可輕視。