林鄭熱廚房班子幾近敲定，如無意外三位司長都可以原裝順利過渡。上位後民望同地位都穩如泰山嘅政務司司長張建宗，唔知係唔係想同大家講，已經準備好坐多5年？
噚日出席香港可持續建築環境全球會議時狂show quali拋書包講「2030+」規劃遠景，由房屋講到高鐵三跑，再由啟德醫院講到九龍東發展，預示未來5年林鄭班子大計，且熟書程度仲同新老闆林鄭有得揮，講足半個鐘頭後，全場畀足面歡呼拍手，掌聲仲比早過佢發言嘅夕陽特首梁振英更多。
至於任期剩返唔夠一個月嘅梁特，唔知呢排玩fb玩太多，抑或前晚六四記起往事瞓得唔係好？抑或驚緊UGL風波仲有手尾跟？噚日發言時，聲音低沉又冇嚟精神，之後仲急急腳走人，名副其實「黯然離場」。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk