有理由相信，「大嘥鬼」可能是香港政府部門管理得最好的Facebook賬戶。之前抽乾鋒味水的「淋晒嘅雞蛋仔都要尊重」，已經俾網民大讚，上周因Donald Trump 決定退出《巴黎氣候協定》，而向侵侵大派真心嬲嬲豬，又是有point 好玩、叫網民真心笑住嚟 share 嘅佳作。
尤其後者，admin 拿揑得幾好㗎，夠快，有立場而且合情合理，話之你美國總統都照抽，仲識得食番侵侵句競選口號，改成「 Make our planet great again!」是好有sense 的回應。
話佢有sense 唔係隨口噏，看看美國國內的回應就知道侵侵總統呢個決定如何不得民心，自製公關災難。
環保組織和活躍份子大反應就唔奇，但搞到美國大企業頭頭紛紛表態，有人立即就劃清界線，公開反對，並且在社交媒體宣佈退出 presidential councils ，唔再做佢智囊，這包括了Tesla 的 CEO Elon Musk 和 迪迪尼嘅主席兼 CEO Robert Iger。
唔止㗎，有25 間美國最具代表性的公司都聯署了一封公開信，反對侵侵這個違背舉世價值觀的決定，苦口婆心叫佢收回承命，這些公司嘅大名，擲地有聲，包括蘋果、Facebook、 Google、HP、Morgan Stanley、Unilever、Microsoft.... 等等。冇加入聯署但有公開表態嘅仲有General Electric同Goldman Sachs等數都數唔完嘅企業同國民。
商界唔撐，地方政府都唔畀面，紐約、洛杉磯、阿特蘭大同鹽湖等地區都宣佈會繼續遵守《巴黎協定》，擺明同中央對抗。前加州州長阿諾舒華辛力加一向唔妥侵侵，佢都唔執輸拍咗條片大義凜然教訓阿侵。
所以你話我哋「大嘥鬼」走得幾前呢，咁有觸覺，抵佢紅嘅，難怪有網民之前仲驚局長冇得留低，會累埋「大嘥鬼」㖭。
彭瑪莉
mailto:[email protected]
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk