羅馬集團（8072）早前被廉署上門拉人，涉事嘅陸紀仁隨即辭去主席兼行政總裁，由公司秘書余季華調任CEO。公司噚晚公佈新人事安排，包括由專業獨董林栢森出任行政總裁，又搵來美聯（1200）前副主席黃錦康，擔任首席策略官。
黃錦康當然唔係一般二打六喇，話說佢勤練太極，喺2012年倫敦奧運期間，為宣傳太極，公開一招「應肚即飛」、「隔山打牛」，將幾個大隻佬同事彈到幾尺遠，4年後嘅巴西奧運，佢又拍鞋墊廣告，教人「致勝心法」，就係腳踏實地。
佢喺武林排名幾多呢，華華就唔知，但佢喺財金界肯定有「朵」。唔知羅馬集團喺呢個多事之秋，搵黃師傅嚟幫手，係咪想佢隔山打牛，將啲霉氣應肚即飛呢？
新任行政總裁林栢森每月酬金4.5萬元，但黃師傅嘅人工就冇公佈，兩位都簽約3年。搵咗兩位入局之後，余季華就做番公司秘書。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk