卡域克效力曼聯11年，周日紅魔為佢喺奧脫福舉行紀念賽致敬，分成卡域克代表嘅「曼聯08歐聯冠軍隊」對「卡域克明星隊」，傑斯、里奧費迪南同雲達沙一班老魔歸位，場面星光熠熠！
卡域克話晒係老臣子，估唔到賽會喺賽前都會擺烏龍，將卡域克個名串錯咗做「Carrtick」，唔理卡域克定卡迪克，場波最緊要係開開心心。比賽由明星隊嘅西班牙中場文迪達先開紀錄，之後尼曼查維迪頭槌扳平。下半場明星隊再次領先，老將羅比堅尼入波，難怪有傳明星隊主帥兼哈利列納伯明翰領隊，打算簽呢位現時無業嘅36歲愛爾蘭前鋒。
球迷最期待嘅畫面，終於喺82分鐘出現，主角卡域克施展招牌重炮遠射，幫08隊追和2:2，和氣收場。場波仲有其他看點，昔日雙紅兩大守將，曼聯嘅加利尼維利同利物浦嘅加歷查，近年一齊做講波佬已經老友鬼鬼，今場波難得對壘，當然唔會留情，其中一幕係加歷查從後鏟低加利佬，唔知有心定無意咯。
朗尼冇料到網民狂插
另一個被恥笑對象係朗尼，相比起傑斯等退役球星，曼聯隊長朗尼假假地都係現役球員，不過對班老鬼就冇乜料到，雖然叫做助攻畀卡域克，但射波飛機之餘，推波又慢，反而連43歲嘅傑斯仲爆得兩嘢，朗尼喺網上又中晒槍。
