荷蘭周日喺友賽主場對科特迪瓦，後衞祖爾韋特文喺13分鐘幫橙軍先拔頭籌，而隊長洛賓喺32分鐘射入12碼之後，祖爾韋特文再建一功，助荷蘭半場領先3:0。換邊後，卡拉臣喺69分鐘為荷蘭射成4:0，隨即由史奈達入替，後者第130次代表橙軍出賽，追平名宿雲達沙代表荷蘭國家隊次數最多嘅紀錄，而雲遜贊臣喺75分鐘錦上添花，助荷蘭以5:0大炒科特迪瓦。