【文化籽：藝文沙龍】
失戀時，情歌每粒字都夭心夭肺；冇事冇幹時，即使你曉唱晒成首歌，歌詞深意可能從未嗒真過。九十後藝術家何博欣（Vivian）在美國讀書時，雙耳沒遠離過廣東歌滋養，即將舉行的畫展，作品以歌詞為題，為平凡麻甩佬畫下「日後路上或沒有更美的邂逅」，滲出庶民浪漫；為「怕被忘記至放大來演吧」的浮誇鯨魚表達無奈。
吸引我找Vivian訪問的，是一幅寫上陳奕迅《葡萄成熟時》歌詞的畫作。畫中兩男在欣賞地盤圍板上一排色情場所海報，「金湖」的是少布妹妹，「翡翠湖」是更少布姐姐。「日後路上或沒有更美的邂逅」這句很耐人尋味。她說：「矛盾嘅地方係海報啲姐姐唔係真實，即使去到夜總會，佢哋都唔會遇到嗰啲姐姐，所以佢哋同海報嘅互動，可能已經算係邂逅，佢哋人生可能未必再有更美的邂逅，咁不如就活在當下，享受呢一刻。」這句是畫作主題，同時是展覽名稱。「我有諗過係咪太長？因為一啲有力嘅名，通常得一兩個字。可唔可以攞走當中一啲字呢？我又覺得唔可以。」她對歌詞的演繹有一份介乎法國與旺角的詩意。
「我自細就聽廣東歌，即使我去美國讀書都一直有聽。流行曲對我嘅影響大過其他文學體裁。」雖然她說話好ABC，講廣東話有英文口音，但佢對於香港人身份看得好重。「去到美國好掛住香港，留意多咗香港流行文化對自己嘅影響。」今次展覽將展出七幅她新鮮滾熱辣繪畫的粉彩作品，市井味濃得化不開。「我創作題材好多時來自街道上的小人物。所有生命都係同等重要，我會戥被忽視嘅人唔抵，spotlight下嘅都係俊男美女同大人物，我好想將嗰啲被忽視嘅人放番喺spotlight下，令佢哋成為主角。」她審視周遭環境與社會變化，連繫流行曲歌詞，演繹成超現實另類故事，荒誕呢就兩茶匙，仲有啲無奈㖭。
小人物當主角 揭示社會「麻木」
有一幅作品用上了謝霆鋒的《遊樂場》歌詞「最繽紛的花園遊樂過 但求動心」。畫中有班人倚着觀景台欄杆向下望，對頭上開出絢麗繁花無動於衷，抬起頭都費事。「天上有異變，但佢哋一啲反應都冇。𠵱家無論新聞有乜爆嘢，大家覺得『都係咁啦，冇嘢可以嚇倒我』，對好多嘢都冇咗刺激感。」活得不痛不癢，是社會通病。如果你對事情還有感受，恭喜你，你免疫於「麻木」。
展覽日期：6月9日至7月22日
地點：A2Z Art Gallery（中環結志街20號）
查詢：VvnHo 面書
記者：葉青霞
攝影：劉永發
編輯：馮秀珍
美術：黃創泰