六四28周年之日，潘頓、莫雷拉身在日本客串，大批惡馬落入一眾二線騎師之手，當中包括現年28歲的李寶利。呢位意大利騎師今午（4日）在沙田日馬，獲蔡約翰馬房委以重任。
結果李寶利贏完一隻又一隻，先係第二場為蔡約翰勝出最熱門「天下為攻」，到第四場四班1200米草地賽，再贏蔡約翰另一匹大熱「常豐裕」，個人用咗短短一個鐘已經起孖，當中「常豐裕」初跑田草順利補中開齋，今場單Win及組合獨贏A1分別派29及17.5元。
全日合計李寶利只為蔡約翰策騎「天下為攻」及「常豐裕」，佢完全冇糟蹋任何機會，從中交出一百巴仙勝出率，兼為自己錄得季內第二次起孖。李寶利早前外遊，曬到成個人黑晒，頗為誇張，但他的手風甚順，完全唔黑。
講番「常豐裕」，三歲馬體型嬌小，體重僅978磅，上仗服役初出，於谷草最短途1000米在雷神胯下後追第三，今次由李寶利接手移師田草加程跑1200米，沿途守第六位，末段好似開咗摩打咁逢馬過馬，後發先至小勝一頭位，成功打開勝門。
第四場二至四名分別係87倍大冷門「得德仔」、熱門「萬事欣」及落飛馬「安喜」，四重彩派三萬二千幾。今場頭馬「常豐裕」僅2.9倍，但搭「得德仔」Ｑ卻99倍。