嗰頭講緊潘頓同雷神身在日本客串，二線騎師意大利勇將李寶利這天（4日）在沙田乘時冒起，勝出第二場「天下為攻」及第四場「常豐裕」起孖。話口未完李寶利又嚟料，第六場四班1400米夥拍文家良馬房「大笑大少」建功，今場單Win及組合獨贏A2分別派105.5及30.5元。
李寶利連續第四次策騎7歲馬「大笑大少」出賽，今仗沿途守第九位，直路衝刺凌厲，後上氣走放頭之大熱門「深愛」（葉楚航馬房），李寶利從而完成個人今季首次帽子戲法，手風之順媲美今日凌晨梅開二度、協助皇馬歷史性蟬聯歐聯冠軍的C朗。而「大笑大少」10倍贏馬打破近兩季齋缽，終於可以完美地向幕後交代。
今場賽後歌手JW和男友葉韋彤一齊為「大笑大少」馬主友人拉頭馬，點知JW企正一位高她成個頭的白衣年輕長腿索女身邊，JW當堂被比下去。
李寶利一如當年的古天樂，近日他曬黑了，事業即大有進展，跑到今日沙田第六場為止，李寶利騎五駒豪奪三冠兩亞全入Q，打造出個人季內代表作，而第七、八場佢都冇馬跑做觀眾，唞足精神尾兩場才再跑，隨時繼續數糊。
反觀大熱門「深愛」上次夥拍雷神初出即後上贏四班1400米，今場多負七磅至133頂磅續排13檔起步，騎師換咗客串一日的韋紀力改用放頭戰略，直路初一度拋離馬群，末段力度減弱，俾黃雀在後的「大笑大少」追過，「深愛」屈居亞軍，未能延續勝利，韋紀力今日亦暫時未入到凱旋門。三、四名分別為「自動波」及「再石磨藍」，四重彩派二萬五千幾。