候任特首林鄭月娥即將公佈新班子，三司原裝過渡，新任局長幾乎清一色政務官，換血大計明顯落空。3司13局掌舵人冇驚喜，行政會議又有冇？除咗有前金管局總裁任志剛助陣有少少驚喜，唔算耳目一新，而且政黨代表不減反增，據聞仲引發一場葡萄大戰。
現屆行會成員中，愛國愛港政黨包括民建聯、工聯會、經民聯以及因為特首戰而辭任行會、葉劉淑儀所屬嘅新民黨，各有一個代表在內，一人一席原本相安無事，但大家又千祈唔好忘記，現屆鄉議局代表張學明雖然以新界人身份入行會，但其實佢都係民建聯成員，據聞張學明下屆離任，順理成章議席由開始坐穩鄉議局主席嘅劉皇發公子劉業強接任。
酸葡萄風波可能出喺呢度噃！劉業強本身都戴兩頂帽，佢同時係經民聯副主席（雖然可能冇乜人為意），若然佢任行會，加上預料會冧莊嘅林健鋒，即係經民聯行內有兩席，雖然行會係諮詢而非實權組織，多個花瓶又點？始終面子攸關，被搶大佬地位嘅民建聯點會順氣？難怪政圈傳出新行會擺位有濃濃的酸味。
最後會點擺平？相信都係一黨兩席，皆大歡喜，現時已非立法會議員嘅民建聯葉國謙料再坐一會，因為身兼港區人大代表，專責就中港問題畀意見，民建聯副主席張國鈞料同時獲任，主力箍票兼就年輕人政策畀意見。民建聯最終冇搵佢頂周浩鼎入專責委員會查UGL，無非想呢位新貴保持清白之身，據聞林鄭對作風踏實嘅張國鈞表現稱許，相信未來發展空間無限。
花生友
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk