每年六四總會有班大學生「衝出嚟X」，攻擊支聯會「消費六四」，其實作為大學生，抄襲網上鍵盤戰士之言論做聲明，都幾好笑。「消費XX」是近年網上爭議常用的萬能Key。你支持悼念六四，就叫做消費六四，「支聯會不思進取，行禮如儀的悼念，意於消費六四，利用民眾之道德感情，換取政治本錢。」
遮住中文大學學生會個名，肯定以為係《文匯》、《大公》，呢種言論其實十幾年前已經每年在黨媒左報發表過N次，今天由中大學生接力，又真係幾好笑。
佔領運動後年輕人認為要拆散大台，除咗本土派外，所謂自決派也對大台保持距離，早前支聯會宣傳六四橫額刪除朱凱廸、劉小麗、羅冠聰名字風波，表面睇是一場誤會，但細心睇朱凱廸回應：「支聯會透過立法會同事借位掛banner，我目前在社區有未用的banner位，按給予同路人方便的原則同意借位，但同時間我希望對六四給出自己的看法，而不是馬上跟大隊，因此我提出不要落名的要求。」我好想問問呢班議員對六四有乜嘢獨特看法，因而唔能夠跟大隊？
對中大學生會當然冇任何期望，但對自決派當選後的表現，其實好失望，本身已經係少數派，部份又面臨DQ的迫害，這是一場政治角力，本應是團結一切有可能團結者，共產黨最希望是內鬥內訌，公眾對DQ事件冷漠反應，原因為何？共產黨28年來最想做的就是拆大台，摻沙子、挖牆腳、色誘、收買乜都做齊，但仍然未能成功滲透教協、支聯會、職工盟、民陣、工黨、民主黨及公民黨，點解？因為有組織力量，而且由89年一路走到𠵱家，即使政見有分歧，例如長毛、陶君行唔妥民主黨，亦唔會當對方係死敵，呢個基礎同六四有關。如果冇組織力量，如果淨係靠搞運動，就最啱共產黨。組織是長期工作，建立核心義工、組織者，大家有一段共同經歷及工作關係，要破壞其實幾困難。相反，要搞掂社運就容易好多。
社會運動本身先天存在可持續性問題，因為群眾不可能長期被動員，而且群眾是要見到有機會成功先會跟隨，當師老無功後，運動就會陷入低潮。再者，共黨要滲透群眾運動，簡單好多，只需現場擺幾個人就足以搞亂檔。另一方面由於群眾運動的邏輯，會不斷走向激進化，也會不斷分裂，所以對家只要坐定定，等你班人自己散。旺角掟磚之後，運動可以說去到了樽頸，一係就再升呢走向暴力鬥爭，一係就收工。而當社運組織化，就等於建立大台，呢班昔日高舉拆大台的人，等如打倒昨日之我而被指搬龍門，陷入進退不得兩難局面。
組織工作同運動好唔同，靠「X」人係冇可能得到支持，靠「諉過於人」的loser哲學來爭取群眾？更只會被主流恥笑。下次如果要爭取某個目標，真係唔好仲講「最衰係支聯會」、「最衰係泛民」、「最衰係長毛」、「最衰郭紹傑」，呢幾年，大家真係已經聽到厭。畀心機提出個似樣少少的論據。
添馬男
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk