兩位都叫阿John的練馬師，這天（4日）沙田日賽上半場均起孖。蔡約翰贏第二場「天下為攻」及第四場「常豐裕」，約翰摩亞（大摩）則勝出第三場「駿馬翹楚」及第五場「火箭駒」。
當中「火箭駒」單Win及組合獨贏A2分別派71.5及26元，勝出練馬師開B4大摩派49元。「火箭駒」勢成下年香港打吡焦點馬。
第五場二班草地2000米青年工業家協會25周年銀禧盃，三歲澳洲自購馬「火箭駒」今季才在港出道，路程越來越長，之前三戰1600或1800米都唔上名，今次增程初跑2000米，用番當日在港初出騎師韋達，沿途守三四位，直路一攻而破，以超班姿態贏2.5馬位，韋達連續第三次賽事贏馬。
大摩講過「火箭駒」係馬房出年香港打吡重要棋子，此駒在澳洲八戰一冠四亞，包括於2016年2000米三級賽羅便臣錦標跑第二，亦跑過舊年維利多亞打吡，來頭唔差，今場果然展現身價，贏到一眾二班長途好手冇得揮。呢匹賽前83分馬估計今仗賽後至少加10分，基本上已夠分入選明年香港打吡。
「火箭駒」馬主洪定騰，係本屆四歲三冠王「佳龍駒」(此駒早前陣亡)馬主洪祖杭之子。洪定騰之前養過「龍騰虎震」，同阿爸一樣都係大摩粉絲，而「火箭駒」首勝二班賽，呢次亦帶挈馬主獲得75萬元優異成績特別獎金。洪家近年馬運亨通，洪氏父子名下馬近兩年內合共勝出14場賽事，戰績極度標青。
「火箭駒」帶挈埋落飛黨中正7.1倍綠燈Win，以及搭亞軍啡燈冷馬「期惑」的66倍綠燈Q，三、四名分別為「超有利」及「明月青天」，四重彩派八萬九千幾。