忘不了的，年月也不會蠶蝕……六四28周年紀念，有人選擇遺忘，但唔少人堅持舉起燭光悼念。若然唔方便公開叫大家毋忘六四，可以有乜嘢方法擦邊球？德國駐香港總領事館似乎都有奇招，六四日喺facebook發嘅post表面好鬼抽水，實則發人深省，寓意無窮。
網民讚對待歷史態度
到底乜嘢po咁值得討論？當特區之首梁振英當年譴責、今時今日話「不評論」、「冇補充」，大家都見到，毋忘六四都要有幾大勇氣，德國駐香港總領事館膽識過人，噚日趁六四喺官方fb出po，以「每週一字」形式教大家一個德文「vergessen」，意思係「忘記（forget）」，例句說明一切：「人民不應忘記歷史（History should not be forgotten）」，德文即係「Die Geschichte sollte nicht vergessen werden」。
官方嘅駐港領事館人員，點會唔知道六四日對港人有乜意義？咁嘅敏感日子教大家毋忘歷史，乜嘢意思？大家心照啦！唔少網民亦激讚，有人話「睇見德國點對待二戰歷史，呢一句說話簡直係擲地有聲」，另有網民話：「德國領事館都提醒香港人勿忘六四，香港就有些自稱『本土』的人叫人唔好『死攬』六四。」
德領館過往不時喺fb「抽水」，但處理歷史問題認真，早前警察協會舉行支援罪成入獄七警集會時，席間有警員發言形容警員似二戰時嘅猶太人被迫害，德領館同以色列駐港領事館事後都表示遺憾，指言論不當。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk