少林功夫加唱歌跳舞就話有收視啫，券商同基金嘅RO（負責人員）聽合規講座加慈善，又有冇得諗？
證監會早前公佈新規定，券商、基金喺7月17號前要登記「核心職能主管」（MIC），唔少公司密鑼緊鼓準備。
天智合規顧問董事鍾婉怡（Josephine）本月29號將會開慈善講座，講解RO此後嘅持續合規（compliance）要求。佢仲特登搵嚟深水埗明哥（陳灼明）做嘉賓，喺講座開始前，分享經驗。
Josephine出身保誠、花旗幾間大行，自立門戶做合規顧問，今次希望幫業界溫書之餘，搵明哥分享亦有心思，希望金融人忙碌中吸收新氧份，認識另一種香港生活。
華華八卦過一輪，原來真係有中環才俊唔識深水埗明哥，又覺得只係搞噱頭。其實明哥本身係深水埗燒臘店老闆，創辦「北河同行」，專門賣平價飯餸，又長期派飯畀基層人士，被譽為「窮人愛心飯堂」。舊年11月，明哥曾於蘭桂坊義賣飯盒一個月籌款。
Josephine話，本月底嘅講座將於收市後進行，明哥分享完就要急急腳返舖頭派飯。
計吓數，每位入場費500蚊（算係行業公價），150個名額，即係7.5萬元，不扣成本，全數捐畀明哥，參加者亦可獲得證書，儲證監會持續培訓時數（CPT Hour）。一舉幾得喇。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk