三十多年前，兩個風華正茂的青年，一個由低做起，留學英國成為專業人士，返港後走過羅湖橋，開始報效國家的生涯；另一個是上等人，美國大學畢業後，回港接手家族生意，獲港英垂青委任加入議會，踏上從政路；兩條平衡線終在2014年交叉，田北俊因高調倒梁，遭北京撤銷全國政協委員職務。事隔三年，梁振英不能連任終於下台，倒梁成功了嗎？
記者 陳雪玲
「我對CY（梁振英）最大嘅意見，係佢做特首，忘記咗係為香港幾百萬人做嘢，行政長官係為市民服務，中央領導都叫你為香港人服務，你唔可以當自己係香港人老闆，你應該當香港幾百萬人係你3司12局嘅老闆（編按：應為3司13局）。」
「（5年下來）梁營愈來愈少，梁粉愈來愈少，管治咪出問題囉，佢仲自我感覺良好。好似創新科技局，（立法會）過嗰日佢仲話你哋拉布三年搞搞震，咪一樣過咗創新科技局；但我係做生意嘅，會覺得做一樣嘢：如果9個月就成功，你同我搞3年，有咁嘅伙計，我第一件事係炒咗佢...咁嘅伙計請來做咩？同個老闆倒米。但個伙計仲以為好威話：『老闆我完成任務喇』。」
「佢做行政長官勝唔勝任﹖中央口頭上話你做得非常好，我唔覺得中央領導心中會覺得佢做得非常好喎，如果成個國家，個個省長、市長好似梁振英咁管香港，中國一早散咗啦。」
「我睇到呢5年來先興所謂拉布，點人數，董生嘅時候議事規則冇改，曾蔭權嘅時候，議事規則冇改，又唔見嗰時泛民喺當時立法會搞啲咁嘅嘢﹖」
「香港又唔係普選嘅行政長官，你又冇3司12局班底（編按：應為3司13局），只係炒埋一碟叫人幫手，如果唔多啲朋友、唔和諧，你點管？所以我希望林鄭喺呢方面做多啲，好開心佢見泛民所講嘅嘢，公民黨嘅（周年）晚會佢都去係好事，第一佢肯去，第二人哋肯請佢，真係和諧嘅開始。以前梁振英做特首時，公民黨已同佢關係惡劣到根本唔請梁振英。」
「自由黨同我都係建制，建制嘅意思即係支持政府，呢樣我唔會唔認，但人哋點解會覺得我突出啲？因為建制入面好似個個都不問原由咁支持政府，有『你要團結、你要歸隊』嘅講法。我哋作為建制派，特別係香港立法會議員都係選舉產生，要代表選民，當選民睇法同北京唔同，當同行政長官唔同，我哋係應該代表市民發聲，因為我哋唔係委任制。」
「全國政協係委任制，所以當佢認為我唔適合做，因為我叫梁振英考慮辭職，我冇唔同睇法，因為佢委任我，你覺得我達唔到要求，你咪撤銷我囉。行政長官喺依家咁嘅選舉模式選出來，差唔多等於委任，但你要記得1200人（選委）都係香港人間接選出來，立法會議員更加係香港人選出來，所以我希望無論建制派抑或泛民議員，都要記得我哋選出來係監察政府，泛民唔應該乜都反對政府，建制就唔應該政府講乜，一吹雞就歸隊。
「行政長官要喺管治方面行返中間，即係藍、黃全部都有，包括我覺得，淺黃嘅泛民點解唔可以做行會成員﹖」
《蘋果》請受訪者回答三條問題，送別梁振英：
一）梁振英有乜優點？
「CY嘅優點？你考着我喎！如果你話我好有自信，我一言堂都係優點，呢兩點，CY係有嘅。」
二）如果100分為滿分，梁振英有幾多分﹖
「你問我就嘥氣啦。我梗係畀佢肥佬，肥佬就肥佬，無謂話佢係50分合格，你畀佢40分定係好低分啦，總之我覺得佢呢幾年令到個社會更加撕裂，係更加，更加分化。喺一個唔和諧、諸多矛盾嘅情況下，後生仔搵唔到好嘅工，大學畢業仲搵萬二、三，樓又愈來愈貴，內地人又買晒啲靚嘅樓……咁嘅麻煩當中，佢令問題愈搞愈大。」
三）對梁振英有何臨別贈言﹖
「CY做咗全國政協副主席，董生都做咗十幾年啦，係咪繼續有咁多嘢講？我就唔知喇。董生係政協副主席又繼續喺香港講嘢，梁振英做咗政協副主席又喺度講嘢，咁林鄭又點做特首呢﹖我梗係希望政協、人大，你唔好來搞香港事，香港嘢等番香港立法會去處理，以往一直係咁……如果任國家副主席，即係梁振英、董建華，更加唔應該管，說三道四，繼續指指點點，咁行政長官點喺未來管治香港？」
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk