Ben Sir教中文教到由課室走入公仔箱，本月23和24日更會於九展舉行兩場棟篤笑「Ben Sir開Show」，問他首次開騷笑點是甚麼？他認真說：「我講笑點，大家就會好高要求，我不如講賣點，講得到笑咪笑，講唔到笑，大家攞到啲乜嘢走咪攞走囉。」
講到棟篤笑內容，Ben Sir已開始度橋：「我會講吓我篇論文，教大家調九聲，講吓風月片結構，唱吓歌仔。我想試吓唔講娛圈嘢、唔講政治，連粗口都唔會講。」他笑言因怕爆粗毀男神形象，令廣告商卻步，但他不會阻止觀眾盡情爆粗，「你唔畀人發聲，咁好大罪，民主社會，情到濃時，觀眾要爆出嚟咪爆，我點去㩒得到呢！個個都係我老細，佢哋喜歡爆咪爆。」