今日是六四28周年紀念，前幾日見到銀行副經理Y，問佢有冇參加上星期之六四遊行，副經理Y話：「冇去幾年啦。」佢出生於1989，六四之後，當年Y媽媽懷着副經理Y，參加百萬人大遊行，𠵱家已成為欷歔歷史。左丁山睇住副經理Y一代長大，自己一代年華老去，無能為力，新一代則覺得中國之事與我何干，難怪今年六四遊行只得一千人參加（警方話四百五十人），今晚維園又如何呢？
北京唔想香港人紀念六四，又要大力批判本土思潮，嚴打港獨。諷刺嘅係，假如香港後六四一代或千禧代多啲關心六四，本土思潮以至港獨幻想，反而冇咁容易傳播。本來紀念六四，等於懷緬中國之心不死，仍然係以今日潮語所講之大中華膠，唔會做本土派。好似𠵱家咁，年青人個個哈日哈韓，甚至乎嚮往台灣田園生活，獨是厭中，不談六四，不講民主回歸，更容易傾向港獨。
六四之前，張德江在5月28日於北京舉行之「紀念中華人民共和國香港特別行政區基本法實施20周年座談會」發表長達50分鐘嘅講話，主要內容係（一）重申加強中央有絕對權力控制香港，一國兩制之要害係一國。中央「授權」，香港特區「被授權」，主客分明，阿爺說你有權就有權，冇權就冇權。呢一點吳邦國在2007年有講過，今次張德江講得更直接。（二）香港冇三權分立呢回事，行政主導係核心，冇甚麼立法主導，司法主導，即係話行政長官可以打電話俾首席大法官下指令。（三）沒有甚麼公務員政治中立，中央對特區法定公職人員是否擁護基本法，是否效忠國家和特區，負有監督責任。公職人員不僅是司長局長的管治團隊，而係所有公職人員，邊一位常秘、副秘、政治助理以至副署長等等都受中央監督，必須效忠，即是所有公務員要聽晒中央聖旨。租維多利亞公園辦六四紀念呀，應是不愛國行為，以後支聯會類似機構想辦活動，政府機關人員可隨時封殺，否則就是不忠。（四）加緊加強宣傳推廣基本法，公職人員、青少年尤應大力學習。以後公務員要倒轉頭識背基本法160條及所有附件先至得，相信教育局長會千方百計在學校滲入學習基本法課程，教師唔識背，冇資格升做校長！偏偏呢樣最難執行，啲學生願唔願意學呢？不如咁嘞，林鄭上台後就下令DSE必考一科──基本法，唔考試，香港學生唔會讀嘅啫！