【《蘋果》專訪】
講粗口諧音紅遍網絡的Ben Sir（歐陽偉豪），有口才、有急才，不但走出課室，跳入公仔箱，本月底還趁勢登上舞台開兩場棟篤笑，殺入娛樂圈。聲演周星馳幾可亂真的Ben Sir，有意做喜劇演員為觀眾放笑彈，更不介意做星爺接班人。
網絡世界有不少潮語，拉低年輕人的中文水平，無綫節目《Ben Sir研究院》針對這社會現象，邀得中文大學中文系高級講師Ben Sir大玩廣東話食字，有料Ben Sir其實是體育系出身，從不承認自己是「贏在起跑線」。
Ben Sir日前在中環接受《蘋果》專訪，他說：「當年考唔到大學，我玩開籃球隊，就喺嗰度發揮，一路玩，一路讀書。教書幾好，人工唔錯，假期多，後來先再去讀番個學位。」他認為做好每一步，自然每一點都贏在起跑線，「唔係只贏一點，一條線係由無限咁多點組成，每點都做好，咁成條起跑線都可以延續落去。」並強調要贏人先要贏自己：「總有人叻過你，有人差過你，比較冇意思。今日嘅我要好過噚日嘅我，明日嘅我要好過今日嘅我。我唔係見好即收，一定要好到盡。」
父母要陪跑
新世代父母狂谷子女報讀不少課程，希望孩子自小已贏在起跑線，Ben Sir鬧爆：「只不過爹哋媽咪將管教細路同相處時間外判畀人，咁好難贏在起跑線，想細路仔去跑，爹哋媽咪要同佢哋一齊跑，一齊經歷，父母唔係坐埋一邊打手機。」大部份人只有一個終極目標，Ben Sir卻唱反調要一心二用：「每一段時間，都畀自己多一個選擇，唔好只得一個夢想，呢個唔得就嗰個，要同步發展。」
鏡頭前後，Ben Sir的口吻都似足搞笑的星爺，訪問時他更即興用「星腔」清唱《浪子心聲》，玩埋甩歌詞。有急才的他，似乎趁勢殺入娛圈，他用考演藝界PhD博士學位做比喻，但沒視帝或影帝目標：「我係一個新人，點可以咁揀擇。」那想做星爺接班人嗎？他說：「條路順住咁行咪行，我鍾意拍喜劇引人發笑。」
三級片免問
Ben Sir認同喜劇演員情緒起伏大：「搞笑要度、要計嘅幾多，引人笑工夫多過引你喊，引你笑同引佢笑又唔同，男女笑點唔同，唔同年齡層，笑點又唔同，好多喜劇明星背後咪抑鬱。」他不介意做茄哩啡，可是猥瑣佬和拍三級片則免問，更自嘲夠「立雜」才受歡迎。
Ben Sir全程對答如流，反應超快：「我OK快，又唔係至快，至快嗰個好大壓力，無敵係最寂寞。反應慢好難搞笑，我未見過一個鈍胎識得搞笑。」
採訪：陳杰
攝影：陳俊強
【不斷進修】體育老師變主持
Ben Sir現年49歲，中學預科時考不上大學，轉讀葛量洪師範學院體育系，做過小學體育老師，其後再進修，95年獲得中文大學文學士學位，主修英文，97年更獲哲學碩士學位。中文了得的他早於13年開始為無綫主持過多輯《學是學非》，去年又做《Ben Sir學堂》，以及於《男人食堂》中負責「粗口學堂」環節，他搞笑有料到，今年再添食主持《Ben Sir研究院》，大講網絡潮語，幽默感亦令他接拍了不少廣告。