英國《每日郵報》日前發表咗過去一季歐洲球會嘅人工支出統計，雖然西甲班霸巴塞隆拿排榜首，不過喺頭25位球隊中，多達15支係英超球隊，就連降班嘅新特蘭（圖），人工支出都竟然高過可以踢歐聯嘅馬德里體育會，合唔合理，真係見仁見智。
報道指巴塞啱啱一季人工開支成2.79億鎊（約28億港元），排歐洲球壇人工榜首，曼聯就以2.65億鎊緊隨其後。紅魔過去一季刷新咗英格蘭球壇紀錄，係史上單季人工支出最高嘅英格蘭球隊。排名第三嘅係2.56億鎊嘅車路士。
喺前25名球隊入面，有15支英超球隊，包括史雲斯、韋斯咸、西布朗等中型班，最誇張係連新特蘭都有份，呢支英超榜尾可以話係高薪低能代表，佢哋過去一季人工開支9,000萬鎊，比起同樣着紅白直間，但喺西甲攞季軍同有得踢歐聯嘅馬體會（8,600萬鎊）仲多。
新特蘭以至英超球隊咁出得起錢，因為英超轉播費收入創新高，好似「黑貓」今季包尾降班都收近一億鎊。