在節目《Ben Sir研究院》中，Ben Sir跟觀眾說文解字，大玩廣東話食字，入肉、啜核又抵死，絕對是「語言藝術」。熱愛運動的他，日前在中環海濱緩跑步，衍生出「奔走行」三個肢體動作，於是就地取材教大家這三個字。
Ben Sir說：「今日介紹腳部三兄弟，奔、走、行。『奔』至快似車，時速90公里，揈到頭髮向晒後，我哋有奔馳。到『走』，速度慢啲，我哋有走鬼，有老鼠走呀，以60、70公里時速避開啲老鼠，走鬼避開衞生幫（食環署小販事務隊員），『行』又再慢啲，散步feel，預你罷駛、慢駛時用30、40公里，躝吓躝吓，腳步三兄弟就係咁去走遍人生。」
Ben Sir強調連着唸「奔走行」切忌有懶音，否則會鬧出大笑話，尤其男士必須讀得字正腔圓，他笑言：「尤其注意『走』字第二聲，『行』要有ng舌根音，千祈唔好讀咗『痕』，『痕』係另外生理上皮膚反應。」
