喺內地唱歌要紅，好簡單！去參加比賽吧。好似宇宙巨G.E.M.咁，喺《我是歌手》一叫成名，紅到發紫。呢類歌唱比賽節目，數數埋埋唔少，Robynn & Kendy前年就曾經參加過《中國好聲音》第三季為人熟悉。
曾經於1977年喺歌唱比賽力壓張國榮奪冠嘅鍾偉強，13年以60歲之齡，參加過《中國好聲音》第二季比賽，翻唱包括《Rolling in the deep》在內嘅幾首經典英文歌，贏盡人氣。之後仲獲林建名賞識，喺九展開咗次處男騷。
至於同R & K同屆嘅選手，仲有KillerSoap主音陳樂基，成功以一首《月半小夜曲》升Key飆高音，殺入16強，帶挈埋KillerSoap多咗好多曝光機會。
有晒辦睇，梗係好多人想參加，當年有指官恩娜同糖妹都想玩埋一份，不過兩人由於唔夠「經歷」，淒慘故仔未儲夠，最終入唔到圍。