吳若希（Jinny）日前因女兒淼淼的正面相被友人在網上曝光，在facebook怒轟對方「屎忽生上腦」，之後更將行動升級unfriend及block了對方。事件掀起愛女被網友評頭品足，她就被惡言攻擊指亂搞男女關係，前晚她於Instagram向網民開火，男友Alex亦貼文護妻女。
老公：我鍾意
Jinny表示：「當你係一個公眾人物，而你會無啦啦喺傳媒同網上世界被人攻擊話你係雞話你係公廁話你釣金龜。」之後更提到要保護囡囡，「我個女，呢一世都係我個女，我冇得揀、我個女都冇得揀，作為媽媽永遠希望畀最好的畀自己嘅仔女，我唔想佢喺成長過程中因為媽咪嘅身份而被一班鍵盤戰士攻擊。」之後再補充：「如果有人傷害我個女，我真係會同你死過。」
Alex亦貼文護妻女：「唔好讚佢，咁佢第時大個一定好靚女好叻女……不要再侮辱我家人！就算我個女，我老婆有幾任性，公主病。講粗口又點？咁又點？我鍾意呀！我愛呀！」
前晚Jinny出文後掀起與網民罵戰，有人指她爆粗可知何謂身教，她回應：「邊個唔識講粗口？因為我講粗口我個女要俾人笑？乜歪理？」不知網民講了甚麼，她再扯火留言：「我發誓！如果我有，我個女即刻死！！」最後，Jinny與兩名網民「理論」兩小時，退下火線時再留言：「我對住呢個_樣，我唔方便公開講粗口啦，費事又俾道德_ _我！」
糖妹開口撐
另外，糖妹昨日出席活動提到Jinny與網民罵戰一事，她說：「佢一向係個直接嘅人，咁樣都好，起碼佢唔會抑鬱。」
採訪、攝影：羅慧敏