今年係香港回歸20周年，之前好多人批評，政府為谷大慶回歸活動條數，好多唔關事活動都當慶祝香港回歸20周年，但如果篤數篤到連協辦單位、政府官員都唔清楚，就真係關公災難！咁啱得咁蹺，有單慶回歸20周年活動真係請關公出場，仲有成20呎高㖭！
話說有親中團體將喺本月23至25日，舉辦「香港關公節」，仲聲稱係用嚟慶祝香港回歸20周年，最近喺港鐵大賣廣告（圖）宣傳。呢個活動除咗會喺中環遮打花園展示「全港大型戶外關公像」，仲有「關公文化表演」同「迎關公籌款晚宴」，真係搞到關公好唔得閒。
有份協辦 梁福元：唔知道
不過八方好奇怪，關公同慶祝香港回歸20周年有乜關係？八方噚日問過協辦活動嘅元朗十八鄉鄉事委員會主席梁福元，佢都好坦白話唔知道，仲同八方話：「呢個要問番大會先知。」佢只知屆時會展示一個20呎高嘅關公銅像喎。
八方其後喺網上，發現呢個關公活動由香港山西商會發起。根據呢個商會網頁聲稱，呢個活動得到香港民政事務局及山西省政府大力支持，將會宣揚關公文化，為香港增加正能量，仲話已邀請到特區官員、中聯辦領導等擔任主禮嘉賓。
既然民政事務局大力支持，八方梗係問問民政局政助徐英偉，點知佢話慶回歸活動太多，唔太清楚當局如何「大力」支持呢個關公節、亦唔知有乜官員會出席，相信當局今次都係從文化角度，支持呢個關公活動喎！
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk