梁漢文（Edmond）8月在九龍灣展貿開騷，早前在尖沙嘴接受訪問，講到取九展而捨紅館，他表示是貪前者可以搭天橋行catwalk。他在音樂上的成就，一直被人覺得「爭少少」，有人戥他得不到等價回報而不值，Edmond反而表現豁達：「可能喺好多人眼中我唔係superstar，但我知道喺粉絲心目中，我係No.1。我係默默耕耘嗰種，好清楚自己行緊嗰條路，會更加入到大家個心。」
唱得之人Edmond人緣在圈中公認好，試過簽約後中途跳槽，身邊友人亦二話不說答應。
感激志偉成全
Edmond說：「有年拍緊《西遊記》，當時未簽Paco（黃柏高），只係簽咗畀曾志偉，份約好短，一、兩年左右，但係過咗半年，Paco就出現。我開門見山同志偉講，志偉話『你去啦，其他嘢我會搞掂。』我好感恩。」
前後四次踏足紅館開演唱會的Edmond，今年反其道，改到九展開個唱。他講到今次音樂會名為「我的另一半」，講的就是音樂：「呢個另一半唔係講太太，係講音樂。之前紅館騷，因為時間關係，好多歌自己抽起咗。我本身都有啲歷史，儲咗好多歌，希望今次畀大家聽啲比較少唱嘅歌。」其實之前林憶蓮、蘇永康在九展的表演，對他都有很大啟發，今趟舞台會落重本。
採訪：盧妹
化妝：Hetty Ma
髮型：moe of fifth
服裝提供：Brooks Brothers
場地提供：帝樂文娜公館