想立即睇下呢間貴族學校有幾豪？只要點擊以下《蘋果VR》網址：
http://bit.ly/2qJka2P
北九龍裁判法院，曾經係全港最繁忙的裁判法院之一，喺二零一零年搖身一變，活化成藝術院校－香港薩凡納藝術設計大學(SCAD)。究竟呢間每年廿七萬學費嘅貴族學校有咩特別？現正就讀動態媒體設計系、來自哥斯達黎加嘅Paola Chen就話：「首次踏足這大樓時我很詫異！因為學院內有所法庭是一件不平凡的事。」原來校舍保留咗一號法庭，舊時或者會喺度聽到「法官大人Objection！」，而家就變成「Thank you for your presentation」。雖然呢度已經變成演講廳，不過以往嘅法官座椅、高臺、犯人欄、保安欄等絕大部分設計都仍然喺到，夠晒原汁原味。唔只法庭，法院嘅其中一間羈留室同60年代落成嘅時候一模一樣，連囚犯喺牆上嘅塗鴉都清晰見到o架。
呢棟二級歷史建築，活化成為藝術大學後，大堂、走廊周圍都擺滿同學嘅藝術品，仲有一排大型白色波波喺牆邊。原來呢啲係價值港幣近七萬嘅Energy Pod，同學仔做到攰，唔使匿喺圖書館瞓，可以堂堂正正去Energy Pod度閂埋門、叉吓電！
校舍環境的確幾有古典特色，不過Paola表示，佢選擇入讀學校係因為呢度自由度大，只需交一次學費，美國、法國、香港四間分校任君選擇，可以隨時申請轉校。想體驗唔同地方文化、攞吓靈感，可以話 完全冇難度。喺度上堂，就算唔明亦唔使驚，香港校舍只有約600位學生，Professor就有更多時間解答同學疑難啦。視覺效果課程教授Bryan Bentley表示：「我常笑說我學習得比我的學生還多。」Bryan本身係荷里活電影動畫師，除咗大片《悍戰太平洋》、《復仇者聯盟》，佢有份參與特效製作嘅《馬拉高》同《魔幻羅盤》仲揚威奧斯卡。佢話視覺效果等有關科技喺近年發展迅速，經常有新軟件推出，難怪已經喺呢行工作超過十年嘅佢，依然要keep住學習新事物。但Bryan樂在其中，「學習視覺效果就像(為自己)建立工具箱；當我指出一個問題，解決它，那就是知識的真諦。」
香港薩凡納藝術設計大學提供視覺效果、廣告、繪畫等科目嘅學士同碩士課程，仲定期舉辦免費導賞團，公眾可以網上預約參觀。
只要點擊上面連結，就可以360度親身感受下裏面嘅文藝氣息。電腦用戶可選用Google Chrome瀏覽器，以滑鼠或方向鍵上下左右移動，360°欣賞片段。
手機讀者，可率先下載全新《蘋果VR》程式，立即體驗壹傳媒集團旗下製作之所有360°影片及VR互動資訊：
iOS： https://itunes.apple.com/hk/app/ping-guovr/id1194504717?mt=8
Android： https://play.google.com/store/apps/details?id=com.appledaily.apple360.hk
採訪：何宛珊(表妹)
攝影：馮峰、Kaman
編審、後期：Kaman