在華商銀行公會吃過午飯，與校友保險N一齊行路向西，邊行邊傾，校友N話有一本新書出版，在天地圖書有售，係崇基師姐鍾月萍博士新著，名為《命運──同命不同運》。原來保險N跟鍾博士學過子平，受鍾博士所託，將本新書送俾左丁山。鍾博士長居加州，佢嘅英文、中文算命著作有幾本，中文版就係「長勝風水」、「人人八字」、」八字良緣」，英文版有Path to Good Fortune,the Meng、Easy Way to Harmony等等，亦在三藩市灣區之中文報紙發表玄學文章。其實佢係崇基地理系畢業，明尼蘇達大學地理學博士，在美國大學教地理，後來由研究地理變遷領悟到中國傳統風水之學，於是讀埋《易經》，自大學退休後就專注於八字研究。
與保險N行到大道中一個地盤附近，有一架貨車泊在路邊，漆上大字，「淼森棚架」，保險N故意考左丁山：「三個水點讀呀？」好彩識得古老演技派演員井淼，立即話：「音藐，多水也。」保險N話：「啱嘞，淼，大水貌，水流廣大，英文可譯作flood。」左丁山加多句：「黑雨之時嘅筲箕灣東大街！」跟住講八卦，做棚架生意（搭棚）最喜三個日當頭，落大雨見大水之時，如何搭棚？公司名「淼森」，三水三木，做搭棚生意，豈非矛盾？
保險N話：「或者另有所指，水生木，如果呢間公司做木嘅生意，叫做森，木憑水生，既然叫做森林個森，一定要有水嘅，所以配一個淼字，未嘗不可。」左丁山包拗頸：「森林需雨露之水，陰水方可潤木，即癸水，淼係大水，應是江湖之水，陽水，壬水也。水多則浮木，木在大水上飄浮，一無是處！」
保險N想講落去，但已行到萬宜大廈，大家夠鐘拜拜。呢啲名字八卦，無須達致結論嘅，點知人地取名「淼森」嘅真正理由箒。回到寫字地方，打開鍾月萍博士本書，翻閱一下，成本書嘅主旨就係想解釋為何同一日出生之人，命盤相同，成就卻不同？鍾博士從世界不同地區，搵到九十個有出生年月日（不知時辰）資料嘅名人，搵到佢地由少到大嘅工作發達成名歷程，試圖從命盤解釋異同，其中有中國富豪馬雲、馬化騰、郭廣昌、王傳福、雷軍等。可惜不知名人出生時辰。準確性要打一個折扣，但如此研究題目：同命不同運，並非傳統玄學重點，而係受過博士班研究方法訓練嘅學者型玄學家，先至會諗得到，鍾博士並非一般玄學家，故此不怕吃力不討好，試圖從統計尋求解釋！